الخميس، 26 مايو 2011

الميدان للجدعان ....

ده اخر كلام قبل بكره يمكن تعقله و تهدوا

كل اسبوع بيبقى فى مليونيه اشمعنى ده بقى اللى واجعين دماغنا فيها؟

و يعنى ايه الاخوان و السلفيين يقولوا على اللى نازلين بكره علمانيين و ملحدين ؟ طب ايه مزعلهم اوى كده و لو زعلانين ماينزلوش و لكن يقولوا مش حننزل و يبعتوا شباب الاخوان عشان لو كانت ناجحه يقولوا برده  دعينا ليها زى 25 يناير على العموم خلينا نتكلم فى المهم الاول و بعدين نبقى نشوف ايه حكايتهم

الفتره اللى فاتت كنا متوقعين حاجات كتير فيها تحصل اهمها محاكمه الخاين عميل الصهاينه و لكن لو يالى مش نازل تلاقى كل يوم كلام شكل اصل تعبان اصل لمؤاخذه مش عارف ماله اصل نفسيته ده مش يخليك مش مطمن على الثوره و مستقبل مصر ايون مستقبلها...ماهى على راى نواره ( مصر ده مزه حلوة و كتير بيطمعوا فيها) بس لو حاكمنا المخلوع على الاقل حندى درس للى جاى وواضح كده ان المجلس العسكرى مضغوط عليه من جهات كتير فالحل السياسى الصح نضغط احنا كمان بقوه عليه عشان نعجل فى المحاكمه و محدش من بره مصر من الالبسين طرح ينطق ربع كلمه

و مش ملاحظ برده ان الداخليه لويه دراعنا و قيادات كتير بتلعب فى الضلمه ..ماهو برده بالعقل كده يعنى ايه كل شويه مساجين يهربوا طب قبل 25 ماكانوش بيهربوا ليه؟؟؟ و حتى العيسوى لما حب يعمل عنتر نقل قيادات منهم بالرغم من ان المفروض الناس ده تقف على العمل مادامت محاله على ذمه قضيه..فمين بقى مصلحته يفضلوا الناس ده؟ و طبعا غير المقلب الكبير اللى خدناه فى جهاز الامن الوطنى اللى طلع هو هو كلاب الدوله اللى هو برده البوليس السياسى زمان

طب ليه لحد دلوقتى المجالس المحليه ماتحلتش مع انها سبب رئيسى فى الفساد اللى فى البلد حتى انا اعرف واحد عينها حد من مجلس محلى فى الكهربا فى مدينه ما و بعد تسع سنين اكتشفوا انها ماكنتش بتيجى و لا يوم عارفين عرفوا ازاى؟.عندها 3 عيال و ماخدتش و لا مره اجازه وضع يعنى متامر و اهبل.. و ده مثل محترم عن فسادهم فى امثله تانيه قذره كتير اهمها التعدى على الاراضى الزراعيه اللى بيحصل تحت اشرافهم

برده طب ليه الغول يطلع بقلب جامد و يقول انا نازل فى الانتخابات اللى جايه؟ و الحوار الوطنى يبقى اغلبه حزب وطنى مش حاجه مريبه برده؟؟ و لا احنا موتنا فى التحرير عشان ناس ده ترجع تنام فى مجلس الشعب تانى؟

نيجى بقى لوزاره العدل و حدث و لا حرج و المره ده حشيل برقع الحيا على الاخر...كتير من لو ماكنش الاغلب القضاه فى مصر معينين بالوسطه و مرتشين و خدامين للنظام السابق ده غير انى اعرف منهم ناس كانوا بيشتغلوا فى امن الدوله كقضاه و بيحكوا على تعذيب بمنتهى التبجح و الفخر
لو مش مصدقين شوفوا تاريخ القضاء و النيابه فى اخر عشر سنين كلها فضايح و حتى تزوير الانتخابات كان فيهم من شارك فيها
طب ارجعوا كده لقصه الموظف اللى حبسه السباعى و ده حاصله بعد 25 يناير محدش ركز ازاى النيابه تعمل كده و لا القضاء رمز برده و ابونا و عيب نتكلم عليه؟

طب و ليه لحد دلوقتى هما رافضين الضريبه التصاعديه اللى حتحمى محدودى الدخل فى مصر؟ و اللى مايعرفش يعنى ايه يعنى انت لو دخلك 100 جنيه تدفع ضريبه 1% و لو دخلك 10000 جنيه تدفع ضريبه 5% مثلا و هكذا و ده قانون ممكن يتنفذ فورا

و مش من المريب انه فجاه كل الناس تطلع تقول البلد حتفلس و لما الخبراء الوطنيين نفوا الكلام ده الكل اتخرس...يا نهار اسود احنا برده ماشيين بنظام المخلوع و الفزاعات عشان مصلحه حد

طب بالنسبه لمحاكمه قتله الشهدا و المصابين مش ملاحظ انها تهريج ماسمعتش مكالمه دكتور مصعب و ماقطعش قلبك اللى حكاه؟ يعنى ايه الظباط يخشوا القفص و بعد المحكمه يخرجوا عادى يشتغلوا ده يا راجل قرفونا كل شويه فى حبس رجال النظام و حفظونا القانون ان لو خروج المتهم ياثر على دليل فى القضيه لازم يتحبس احتياطى...اشمعنى فى ده بقى؟ زى ماهو اشمعنا روحت فى امبابه بعد خمس ست ساعات و فى السفاره الاسرائيليه جريت جرى...ايه هو احنا حنعيد تانى ايام مبارك

و بعدين انتوا مش متفقين ان مبارك خاين للبلد ...ليه مايتحاكمش عسكريا و لا هو بس النشطاء اللى بيتحاكموا عسكري؟ و على فكره لمرهفين الكلب لو مبارك خد اعدام مش حيتنفذ لانه فوق ستين و طبعا ده على اد معلوماتى القانونيه المحدوده اوى

الاعلام اللى بعد ماكان بينافق مبارك بقى بينافق الثوار و حاليا المجلس العسكرى و فى كل مصيبه تحس انهم بيطلعوا لسانهم لينا مع ان مرتباتهم هما و الشرطه و القضاء بتيجى مننا مش من حاكم البلد

و يعنى ايه فى موضوع الاعتداء على الكنايس تسيبه كده و ماتحكمش اللى عمله بشكل واضح و شفاف و ليه ملف كنيسه القديسين ماتفتحش تانى مش المتهمين اللى فى طلعوا برائه؟ و ليه قتل اللواء بطران فى السجن ماتفتحش فى تحقيق واضح...و مليون الف ليه عايزين عدل و شفافيه نبوس رجليكم

المهم هى مصايب كتير بس ده اهمهم و حننزل بكره نطالب بالمطالب ده اللى ماظنش ان فيها طلب مجلس رئاسى عشان احترام راى الاستفتاء مع ان المجلس نفسه ماحترمهاش لما طلع علينا بالدستور الجديد المؤقت و برده الكل لازم يفهم ان المجلس العسكرى هو رئيس الجمهوريه دلوقتى فمن حقى انتقد اى شئ عليه و ده يختلف عن الجيش ..و الكوميدى زى ماظهر ناس تقول اسفين يا ريس ظهر ناس تقول اسفين يا مجلس و عجبى

اما بقى بالنسبه للاخوان اللى برده استعمله الخطاب الدينى فى تكفير اللى نازلين بكره و الصور ده تشهد على كده هما جماعه نشات فى الظلام و اتعودت تتعامل بالالتفاف على النظام السابق لكى تستمر فخلاص هما اتعودوا على كده و من حقهم يخافوا على نصيبهم فى التورته اللى هى مجلس الشعب اللى من وجهة نظرهم حيكتسحوا و يقدروا يسيطروا على وضع دستور جديد يعنى من الاخر هى الفيصل الوحيد اللى استفاد جدا بالثوره بدون النظر بقى فى الوطنيه و حب مصر لانى مش بخونهم بس هما ماشيين بنفس نظام مبارك عايزين يوصلوا للحكم عشان بردوا يكونوا اوصياء على الشعب و مش قادرين يفهموا ان الدستور حيتحط عشان يناسب كل المصريين اى ان كان دينهم او ميولهم السياسى غصب عنهم و برده هما حرين فى افكارهم لاننا بنطالب بالحريه للجميع مادامت لن تضر احد و لكن حريتك تنتهى عند حريه الاخرين...فمش مقبول اسلوب استخدام الدين و التكفير عشان الدنيا تمشى على هواهم تماما

احنا نازلين برده عشان الكل يفهم ان الثوره لسه موجوده لان الحزب الوثنى بيراهن على عامل الوقت و ان الامور بكره تهدى و ترجع الميه لمجاريها...فلازم ننزل بكره و نكمل الضغط لاخر المشوار و نتحد مش نتفرق فى الجدل الكتير اللى دخلونا فيه بعد مبارك
و يا مجلسنا يا حكمنا يا حبيبنا لو حد ضاغط عليك قولنا و مالكش دعوه شوف احنا حنعمل ايه ما نواره نجم صوتها اتنبح و هى بتقول رقابتنا سداده

انا عارف ان ماينفعش نعمل الدوله الفاضله و السرقه و الغش سياسى من طبيعه البشر ..بس كل اللى بحلم بيه مصر كويسه كويسه بس و الفساد يتحارب بشكل علنى مع انه عمره ماحيخلص....بحبك اوى اوى يا مصر


يا مصر يا امنا يا مصر يا ارضنا يا مصر يا حبنا يا مصر يا عشقنا
يا ام الصابرين...توهنا و التقينا...يا ام الصابرين ...على ألم عدينا






كل ليل آخره نهار
مهما طال الانتظار
الأمل إللي في عيونا
مش بيعرف الانكسار
في القلوب صوت بينادينا
والحنين إللي ماليناأيوة مارد صاحي فينا
راح يعيش لو وسط نار
كان لازم ننتفض لازم نثور
كان لازم ينتصر جوانا نور
كان لازم ينكسر لو ألف سور

طب مين يرضى السكوت
طول ما فيه جوانا صوت
جرحنا لازم هايصرخحتى لو كان فيها موت
راح تهون كل الآلام
إحنا أهو مش بالكلام
شمسنا هاتطلع عشان
حلمنا رافض يموت
كان لازم ننتفض لازم نثور
كان لازم ينتصر جوانا نور
كان لازم ينكسر لو ألف سور


الثلاثاء، 24 مايو 2011

روحوا صلحوا نفسكوا قبل ماتصلحوا البلد...خربتوا البلد!!!!!!!! جزء الاول

ده اول مدونه لينا ....و انتظروا المزيد:)
دلوقتى بقى اكتر كلمتين بيتقالوا كل ما الواحد يكلم حد عن يوم 27  مايو روحوا صلحوا نفسكوا قبل ماتصلحوا البلد...خربتوا البلد


يعنى لما نصلح نفسنا البلد حتصلح..يعنى لو مابصليش و بدات اصلى البلد حتتعدل؟؟ ايه المنطق ده ..و السكوت عن الظلم حيخليها تتصلح و خلاص امنت ان الشعب هو اللى وحش و لازم يثور على نفسه؟ احب اقول لكل واحد قال كده انت بمخك ده اللى حيخرب البلد
سافرت فتره فى دبى و كنت مبهور اوى بيها و بنظام شوارعها كل الناس بتسوق فى حارات و منظمه و لو خارج من شارع جانبى فى خط ابيض متطل اول مره اشوفه بيقف عنده لوحده سالت صاحبى اللى كان بيفرجنى قالى ده خط ستوب لازم يقف عنده من غير حتى اشاره فاستغربت و قولتله هى الناس ده منظمه اوى كده ليه يجى الشعب المصرى المتخلف بتاعنا يفهم يعنى ايه نظام
و تانى يوم روحت الجوازات هناك لقيت ناس بتاخد رقم و بتعد تستنى دورها لما الكومبيوتر ينادى اسمها و مافيش حاجه اسمها تعرف الموظف فلان فتقوم تروحله و يخليك تعدى دورك و كان صاحبى معايا برده فقولتله نفس الكلام تانى انا امنت اننا شعب متخلف ماينفعش معاه الا ضرب الجزم فصاحبى كعادته مردش عليا و اكتفى بابتسامه.
المهم تانى يوم صاحبى صحانى الصبح بدرى و قالى حنروح مشوار مهم جدا لازم تيجى معايا فيه..بينى و بينكم انا كنت سهران انتوا عارفين دبى بقى:) و مش قادر اقوم بس تصميمه خلى الفضول يكلنى و قولتله انت ورتنى عجايب الدنيا السبعه فى دبى ده غير المزز حتورينى ايه تانى؟ ضحك و قالى بس قوم يلا اشرب الشاى  و البس ..قومت و انا مش قادر بس عايز اشوف ايه الجديد تانى و اللى عمرى ماشوفته فى المتخلفين المصريين(زى ما كنت فاهم ساعتها)
خدنى على حته اسمها الصناعيه فى الشارقه و كانت صدمه بالنسبه ليا مقارنه بالى شوفته من نظام و احترام بس طبعا مش مقارنه بمصر برده
لقيت الشواع مش متخططه و الناس بتسوق بمزاجها و فوضى و عشان هما خدوا على الحارات لما بيلاقوا فوضى بيحبوها بس طبعا بغباء تام فى السواقه
فسئلته مش ده الشعب اللى شوفته بيقف على خط الستوب و ده الشعب اللى قاعد بيستنى دوره فى المصالح الحكوميه بمنتهى الادب مالهم اتغيروا كده ليه و لا انا لما جيت عدتهم بفيروس المصريين فى الفوضى و الهمجيه قالى انت لسه مافهمتش برده؟؟!!!!!
راح واخدنى تانى على دبى و هناك بدات افهم شويه بدا و احنا سايقين بيشاورلى على كاميرات متركبه فوق اسطح المبانى العاليه بتراقب كل حاجه و رادرات كل كيلو تقريبا جو المدينه نفسها و بعدين روحنا الجوازات تانى و بدا يفهمنى و شاورلى على كاميرات فوق كل موظف و قالى لو على الموظف عايز برده زى مصر مع انه اماراتى نفسه يفتح الدرج و نفسه يمشى اصحابه الاول و الناس اللى بتسوق فى الشارع نفسها تسوق بفوضى و براحتها بس النظام عامل نظام و عادل للكل و ده ربى اجيال خلتهم خلاص يمشوا على نظام عميانى و لو ان برده النظام اتشال بعد شهرين حتلاقى الناس كلها نسيت و رجعت للفوضى تانى..و سكت شويه و انا زى مكون مخبوط عشرميت جزمه على دماغى لانى كنت فاهم انى همجى و متخلف..و بعدين قالى كلمه اخير انت مش ملاحظ ان ناس اللى ماشيه على نظام هنا جنسيات كتير و فى منهم من دول اكتر فوضى من مصر؟؟؟


انا اسف انى طولت عليكم بس هى ده الحقيقه كفايه بقى ظلم فى الشعب و استعلاء عليهم الناس مش ذنبها ان مافيش نظام 
 يا جدعان البلطجى كان لما ينزل المترو بيبقى محترم
لازم نفرق مابين دور الفرد اللى هو بطبيعته بيميل للفوضى و الهمجيه و مابين المجتمع اللى بيحكم الافراد من ناحيه الاخلاقيه عن طريق العرف المنتشر و الاديان و مابين الدوله اللى بتحط نظام و قانون للعلاقه بين الافراد فى المجتمع و بتمنع انتشار طبع الفوضى فى الفرد

و عشان كده احنا نازلين يوم 27 لاننا عايزين نظام جديد يقاوم الفوضى اللى جوانا و ينظم العلاقات بالعدل مابين كل افراد المجتمع و مش عايزين نظام النظام اللى فات اللى لسه موجود لحد دلوقتى بالدليل انك لسه شايف المجتمع كله افراد فوضويه و همجيه

بعد ده كله لسه بتقول لازم نثور على نفسنا الاول!!!!!!!!!!!!!!!!!!!!!!!!!!!!!!!!!!!!!!!!!!!!!!!!! يبقى تييييييييييييييييييييييت