الخميس، 30 يونيو 2011

المشير أولا يا ولاد......


ملحوظه: اكمل انت باقى العنوان لان المدونين لم يتركوا لى شتيمه فقد استعملوها جميعهم فى عناوين مدوناتهم

ان ما حدث من ثوره فى مصر هو ملحمه اخرى تضاف لتاريخ ملحمات هذا الشعب الذى يعانى ليس فقط منذ 30 عاما و لكن منذ ان خلقت الخليقه و هذه المعاناه كانت تضحبات حاول ان يشترى بها مستقبله و لكن فى العاده يدفع ثمن حلمه ثم لا يشترى ..فما اكرمك شعب

فى يوم 11 فبراير احس هذا الشعب الكريم انه قد اقترب من حلم سرق من أجيال سابقه حلم المستقبل المشرق و فرحت معهم لدرجه انى شعرت بقرب توقف نبضات قلبى و حتى صغيرتى التى لم تتجاوز 4 سنين صرخت فرحه بعباره ارحل ارحل يا مبارك مش عاوزينك

و مرت أيام و ايام عصفت باحلامنا الكثير و كل يوم يمر تومض اسئله متناحره الى عقلى يرفض قلبى الاجابه عليها و لكنه يعرف اجاباتها و لكن قلبى يعشق هذا الحلم الذى فيه رسمت جنه مصر و لكن اليوم و بعد مرور 5 أشهر على ثوره الاحلام قلبى قد ادمى من مقاومه اسئله عقلى و لم يعد قادر على مقاومه عقلى و تغلب عقلى و لذا اكتب اليوم لاشارككم ما ارى و اسئلتى لانه لم يعد لدينا وقت كافى حيث ساعات قليله تفصلنا عن ميدان التحرير و الاعتصام المفتوح

السؤال الاول:

و سابدء بهذا السؤال الذى سئله الكثيرون و قاومته فيما سبق يوم 2 فبرايرلماذا سكت المجلس الاعلى طول مده موقعه الجمل و لست اتحدث عن الجيش الذى قام بعض افراده مثل اسد التحرير بمساعدتنا و لكن اتحدث عن المشير و اعوانه؟ هل كانوا يراقبون اخر محاوله للنظام لاجهاض الثوره لكى يحددوا إلى من سينحازون؟ ام كانوا شركاء فى ترتيب موقعه الجمل؟ ام حقا لم يريدوا التدخل لكى لا يقومون بضرب بعض من افراد الشعب المصرى؟ و لكن اذا تاملنا الجمله الاخيره فهى حجه لمن لا حجه له لان دور الجيش هو حمايه امن الوطن و كان ببساطه قادر على الفصل بين الفرقتين و لو استخدم وسائل الترهيب فقط

السؤال التانى:

وهو السؤال الاهم و الاخطر و الذى سأسرد معه بعض الحقائق السريه

ماذا حدث فى يومى 10 و 11 فبراير؟ هل قال المشير للرئيس انت رئيس وحش و ارحل منها بلهجه قويه و ثوريه فخاف المخلوع وجمع حقائبه و ترك الجمل بما حمل؟ ام تم اتفاق ما بين المخلوع و المشير و النظام لاحتواء الازمه و استمرار النظام بدون مبارك ؟ و هل شهد  الشيطان على هذا الاتفاق؟ و هل كان توفير الامان لمبارك و النظام الذى مازال حالى و ليس سابق لمده معينه حتى ترتيب الاوراق مره اخرى و الخروج الحقيقى الامن مقابل ترك الحكم للمشير الذى بدوره يجهز سياسيا لدفع الراى العام سياسيا لانتخاب رئيس اخر يحافظ على هذا النظام؟ و أيضا ماكان الدور الحقيقى لامريكا اذا كان هذا هو الاتفاق؟

بعض الحقائق:

1-      يوم 15 فبراير تقابلت مع صحفيه كبيره اماراتيه من اصل مصرى و كانت فى يوم ما رئيسه تحرير مجله زهره الخليج و لن استطيع ذكر اسمها و لكن كل لبيب بالاشاره يفهم. حيث تحدثنا طويلا عما حدث و يحدث فى مصر و قد فاجئتنى بانها تؤكد ان مبارك و اسرته اتوا للامارات بعد التنحى و يقيمون فى أحد قصور الرئاسه و ان جمال و سوزان اتوا من قبل خلال 18 يوم فى الثوره و قاموا بتحويل جميع الاموال للشيوخ الامارات و امراء السعوديه

2-      يوم 22 يونيو تحدثت هاتفيا مع مدير مكتب احد اهم شيوخ الامارات الذى اكد لى ان مبارك جاء للامارات بعد التنحى و لكنه بعد يومين قرر العوده لمصر مره اخرى كما اكد لى ان امواله حولت مابين السعوديه و الامارات و ايضا ان مايدور من حوارات حول مصر فى تلك القصور التى تشبه قصور الشيطان ان مبارك رجل طيب و زعيم الامه و ان الشعب المصرى شعب قليل الاصل و بناء عليه اكد لى انه حاليا و خاصه فى ابوظبى يتم وقف اغلب تصاريح العمل للمصريين تأديبا لهم

و هنا يقفز سؤال اخر خبيث  إذا كانت هذه المعلومات صحيحه التى اثق شخصيا فى قائليها لماذا خرج و لماذا رجع؟

السؤال الثالث و الرابع الاخير:

اذا كان الجيش لم يريد التدخل فى موقعه الجمل مدعيا البراءه و الحفاظ على الشعب بكل طوائفه فما تفسير ماحدث يوم 9 مارس؟

و اذا اغمضنا الاعين عن ما سبق.. من قتل شهيد 9 ابريل؟ و هل عندما اعلن الجيش فتح تحقيق الذى لا نعلم عنه شيئا حتى الان كان فقط لتهدئه الراى العام؟

و احب ان اعترف هنا اننى حتى هذا اليوم كنت ادافع عن هذا المجلس ليس لايمانى بانه وطنى و لكن من مبدأ الست اللى عارفه ان جوزها بيخونها و مش قادره تتكلم عشان ماتخربش البيت و منتظراه يعود لعقله لوحده

و لكن مع كل تطورات ما يحدث فى مصر لن استطيع الصمت اكثر و لا أجد اى مفر بعد اجابات كل هذه الاسئله الا ان أقول المشير اولا

نحن لم نقم بثوره ننادى فيها بتنحى مبارك و تولى المشير فى السلطه و لكنه هو من طلع علينا و اعلن حمايته للثوره اى ان كانت اسبابه و دوافعه فهو التزم بتحقيق الحلم البسيط للمصرى الفصيح و لكن حتى الان هو يشارك فى تحويل حلمنا لكابوس وبمهاره و خبث سياسى مرعب مما يجعلنى أعلنها بوضوح اذا كنا مازلنا نريد تحقيق حلم مستقبلنا كما نريد نحن فعلينا بالمشير اولا و ليس شيئا اخر

و لست اقصد بكلامى حربا على الجيش و لكن يا مشير اما ان تصلح مافعلته بنا فى هذه 5 اشهر السابقه و تسلم لنا مبارك و اعوانه وتساعد فى حلم الفقراء لتكفر عن ذنوبك التى ملئت ارض المحروسه و اما ان تتركنا نكمل حلمنا الذى لم نتنازل عنه ماحيينا لان دم شهدائنا ممن سقطوا امام اعيننا مازل يطاردنا فى احلامنا و اهات الغلابه تدوى فى اذننا كل لحظه تمر بنا فلن نتخلص منهم الا بتحقيق حلم المستقبل و اى ان كان الثمن

و انا عن نفسى لا اجد الا ان ترحل و تتركنا فى فوضتنا و مع اصدقائنا البلطجيه الذين هم أشرف من الكثير فمنهم الفقير و ليس بلطجى الا شكلا و منهم البلطجى الحقيقى الذى يعلنها انه بلطجى على الملئ بدون خبث و التفاف مثل النخبه العظيمه فى مصر فأنا لا اتوقع من المؤسسه العسكريه التى أهدرت حق اهالى شهداء حرب اكتوبر و مصابيها ليومنا هذا ستاتى لنا بحق شهدائنا الذين سقطوا تحت حمايه المجلس العسكرى

كلمتى الاخيره لدعاه الاستقرار و لاعقى البياده التى ستؤرقهم كثيرا هذه المدونه كما يؤرقهم عودتنا لاعتصام التحرير الم تسئلوا انفسكم لماذا تجرأت الداخليه مره أخرى علينا نحن أسيادهم بما ندفعه لهم فى حمايتنا.. الم تسئلوا عقولكم المستنيره يا من تنادون بعجله الانتاج من اين اتت حق قنابل الغز السامه الجديده بعد ان كان حكومه شرف الغير شريفه تجوب الارض تسولا لجمع الاموال؟ الاجابه بسيطه جدا تمت عمليه الخروج الامن لجميع سفاحى مصر و ما تبقى الا وصول احد حشرات النخبه للحكم و لكن والله لن يحدث هذا مادمت انا و كل شاب مصرى يعشق ترابها حى

و لكن فى النهايه انها حريه الراى و التعبير فى أرض مصر فكما تشاؤن عبروا ضدنا فى ارض مصر و اقتلوا احلامنا و اصلبوا ابن الشهيد كما تريدون اما نحن فسنظل فى سماء مصر تاركين لكم ارضها تعثوا فيها فسادا محلقين فوق رؤسكم باسهم من النار اسمها الثوره صناعه مصريه ثمينه و قنابل مسيله لدموعكم اسمها الحريه و لن نهبط لارض مصر حتى نطهرها منكم جميعا
لمن لا يعرف ماذا حدث لثورتنا فى خلال 5 أشهر و جعلنى اكتب هذه الكلمات شاهد ماذا حدث للشهيد محمود خالد فى 5 أشهر و انت ستدرك ماذا حدث لثورتنا فى هذه المده 

الجمعة، 24 يونيو 2011

مرشح الرئاسه رمز الكنبه ..منافس رمز البطه!! الجزء الاول


بعد كل مامرت به المحروسه من احداث مجيده و ثوره عظيمه و ما يحدث الان من طوائف تلهث لتاكل تورته مصر و دم الشهداء ثورتنا و العديد من مرشحى الرئاسه الذين تشابه اغلب برامجهم و لم استطع الاختيار بينهم حيث اننى لا اعرفهم شخصيا و من الواضح ان الاختيار سيكون بمعرفه الاشخاص المرشحين و ليس برامجهم.

فقد قررت و يحز فى نفسى ان اترشح لمنصب رئاسه جمهوريه مصر العربيه.......تسقيف شديد

و بعد هذا القرار سياتى الى ذهنكم سؤاليين موضوعيين و منطقيين و بعيدا عن من اكون انا الاول ما اتجاهى السياسى و ماهو برنامجى؟ دعنا نجيب على الاول سريعا قبل ان ابدء شرح اجابه السؤال التانى التى ستكون اجابه مطوله جدا(اللى بيخاف يروح)

تيارى السياسى هو ان ليس لى اى تيار سياسى لست اخوانيا و لا ليبراليا و لا يساريا ايمانا منى ان هذه التيارات نشئت فى ظروف لمقاومه ضغط الجهه الحاكمه فى قرون سابقه و بتجربتهم نستطيع الان فى القرن الواحد و العشرون ان نطبق نموذج يشمل المحافظه على عادتنا و الحريه للجميع و العداله الاجتماعيه و ليس من المناسب لتطبيق هذا المثلث ان يكون الشخص منتمى لاى من التيارات السابقه لانه ببساطه سيميل لضلع فى المثلث عن الاخر

نقطه اخرى احب ان اثيرها قبل عرض برنامجى الانتخابى هل اقبل بدوله مدنيه او مدنيه بمرجعيه اسلاميه او اسلاميه؟ لن اقبل عزيزى الشعب باى دوله منهم و لكنى ساقيم دوله مصريه فقط

و هل ساجعلها رئاسيه ام برلمانيه او شبه رئاسيه؟ سؤال اجابته واضحه بما انى ساكون الرئيس فانا اريدها رئاسيه

و نقطه و من اول السطر و كل يفتح مخه فى البرنامج و اللى صاحى يبلغ النائم

البرنامج الانتخابى:

قبل ان ابدا احب ان احيي دماء الشهداء الذين اخرجونى من نفقى المظلم لاتكلم بحريه مطلقه عن برنامجى الانتخابى و ترشيحى للرئاسه

و لهذا اول قرارتى عند الوصول للحكم هو اعدام مبارك و زوجته واولاده و كل المتورطين في قتل الشعب المصري سواء الشهداء او في وسائل الموصلات مثل العبارات والقطارات والطائرات وهلما جره والاقامه الجبريه مدى الحياه في المناطق العشوائيه التي لايوجد بها ماء او صرف صحي لزوجاتهم واولادهم و حبس مدى الحياه لجميع وزراء مصر من سنه 1981 حتى 2011الي ان يتم اثبات برائتهم من تهم الفساد واجبارهم اعادة كل الاموال المنهوبه الاقامه الجبريه لكل اعضاء الحزب الوثنى الديمقراطى الحلو و الوحش و واسر الوزراء لان الشباب اللى ماتت كانوا فى عمر الزهور و تركوا اسرهم بسبب كل هؤلاء سواء من شارك فيهم فى افساد مصر او شارك سلبيا بالتشجيع لهؤلاء السفاحين

و ساطلق اسماء الشهداء حتى من حرقوا الاقسام على كل ميادين مصر و ساحول ميدان التحرير لمزار سياحى حقيقى مثل الاهرامات ...رحم الله شهدائنا

تشكيل الحكومه:

حكومه تكنوقراط كل وزرائها من اصحاب العلم فى مجال كل وزاره على ان يكون عمره لا يتعدى سن 50

اعاده هيكله سياسه الوزارات:

1- وزاره الداخليه:

سأحولها الى وزاره مدنيه تحت مراقبه مباشره من منظمه حقوق انسان فى الوزاره و اجهزتها و كل الاقسام و المراكز على مستوى الجمهوريه و مراقبتها بكاميرات مراقبه

فصل جميع قيادتها تماما و بالنسبه للظباط المتورطين فى قتل الشهداء سيتم ايقافهم عن العمل الي الانتهاء من محاكمتـهم و من تظهر برائته سيرجع للداخليه فى عمل ادارى .

اخضاع عمل الوزاره لنظام الايزو كمصلحه مدنيه و ايضا مراقبه الجوده فى تقديم الخدمات

زياده عدد افراد الشرطه عن طريق تعيين خريجى الحقوق كظباط و دبلومات التجاره كامناء و افراد بعد تدريبهم

مراقبه كل اقسام الشرطه بكاميرات مراقبه

ارسال المدرسين باكاديميه الشرطه لبعثات للخارج لمده سنه لتدريبهم و تاهيلهم لقياده الكليه بعد رجوعهم مع فصل كل القيادات القديمه

بالنسبه للمرور و المنظومه الامنيه ساتحدث عنهم لاحقا

يا شعب حخليهم فى خدمتك انت بس من الاخر اللى صابع رجله بيوجعه و مش عارف يروح المستشفى يتصل بيهم عشان ينقلوه خلاص يا شعب حفعلك خدمه شرطه ديلفرى مجانا



2- وزاره العدل:

سابدا من اول وكلاء النيابه لمراجعه اليه تعيينهم كيف تمت و هل استحقوها ام بالواسطه وصلوا و سيتم فصل كل من اثبت انه لا يستحق

ايقاف كل القضاه الذين شاركوا فى تزوير الانتخابات

استقلالية القضاء

هي العقيدة القائلة بأن القرارات القضائية يجب أن تكون حيادية وغير خاضعة لنفوذ الفروع الأخرى للحكومه(التنفيذية والتشريعية) أو لنفوذ المصالح الخاصة أوالسياسيه، وبعبارة أخرى ما يسمى فصل مابين السلطات الذي يمكن تلخيصه بمقولة لادوارد جيبون صاحب كتاب " اضمحلال وسقوط الامبراطورية الرومانية " والتي تعود إلى عام 1776، تلخص مبدأ الفصل بين السلطات في أن (مزايا أي دستور حر تعدو بلا معنى حين يصبح من حق السلطة التنفيذية ان تعين اعضاء السلطة التشريعية والقضائية)ففي معظم الحالات يتم ضمان استقلالية القضاء من خلال إبقاء القضاة لمدد طويلة وأحياناً مدى الحياة في مناصبهم وجعل إزاحتهم من مناصبهم أمراً صعباً

و اهم شئ عدم ابقاء اى قضيه اى كان نوعها اكتر من سنه فاذا استمرت سنه و لم يبت فيها تحول الى محكمه مستعجله



3- وزاره التعليم

زياده موازنه التعليم الاساسى مع ارسال المعلمين لبعثات خارجيه لدراسه احدث الطرق و ازاله اى مصاريف للمدارس و محاوله تعيين مستشارين للتعليم و مدرسين خريجي مدارس اللغات والجامعات الكبري لتعليم اللغات بدل انجليش اول ذا تايم ده فحتونى يا شعب بتكلموا انجليزى باللهجه المصريه.

حمله التعليم للجميع مع اعلان عدم التعامل الحكومى مع اى شخص غير متعلم حتى نهايه مرحله التعليم الاساسى..و بعد سنتين الحكومه مش حتعامل حد ماعندوش اكاونت فى الفيس بوك

زياده اجور المدرسين الى الحد الذى يليق بمتطلبات الحياه مع اصدار قانون برفد اى مدرس يثبت انه يعطى دروس خصوصيه ...ده انا من دلوقتى بحوش حق الدروس الخصوصيه لبنتى اللى عندها 4 سنين!!حـــــــــرام

اما التعليم العالى سافرض به بعض المصاريف للتشجيع على التعليم الفنى مع اعفاء المتفوقين من هذه المصاريف البسيطه عشان تذاكروا بدل تهييسكوا على الفيس و ده برده حيكون فى مصلحتى:P

و اعاده هيكله ادارات الجامعات و انتخاب عمداء الكليات و رؤساء الجامعات

اعاده نظام البعثات للجامعه بشكل حقيقى يفيد تقدم الدوله علميا و بدون وساطه لحسن البطيخ اللى بيدرسوه لينا فى الجامعات و بالذات كليات الطب و الهندسه خلانا ترتيبنا الاول بعد المليون فى جامعات العالم

اما مركز البحوث سوف ينضم الي وزارة البحث العلمى و يكونا تحت اشراف مباشر من خيره علماء المجتمع مثل احمد زويل لتطوير المنظومه الحاليه للبحث العلمى مع الابقاء علي جامعه احمد زويل

4- الصحه:

و هنا لنا وقفه فوزاره الصحه هى وزاره عقيمه مهلهله و تحتاج الكثير و الكثير و سيكون اول و تانى قراراتى رفع اجور العاملين فى مستشفيات الصحه خلى الدكاتره تعيش شويه اصلهم بيطلع عينهم عشان يبقى دكتور و لما يتخرج يفاجئ انه متصنف انه تحت خط الفقر

J و ثانيا اعطاء بدل فتح عياده مادى حقيقى للاطباء الذين يعملون فى مستشفيات الصحه

انشاء شركه او اتنين خاصه لتقديم خدمه التامين الصحى للمواطنين فقط على اجبار كل اصحاب الاعمال على التامين للموظفينهم بشكل سنوى و لن نقدم لهم اى خدمات حكوميه او تجديد تراخيص بدون هذا الشرط عشان يبطلوا افترع على الغلابه

انشاء اداره مراقبه جوده من الصحه و شركات التامين لمراقبه المستشفيات الخاصه

التاكيد على تقديم الخدمات المجانيه للمواطن فى مستشفيات الصحه على اكمل وجه مع وجود قنوات رقابيه منفصله عن الوزاره و تستقبل شكاوى المواطنين



5- الاقتصاد و الاستثمار

ده بقى اهم شئ للفقرا اللى انا منهم

سافتح ارض مصر كلها منطقه حره لانشاء مصانع اجنبيه بشرط ان تكون الايدى العامله مصريه و بحد ادنى لمرتب العامل لا يقل عن 3000 جنيه مع الغاء الجمارك على كافه المنتجات...عارف هوقع اقتصاد البلد فى الاول بس حفرم الصناعات اللى مايعلم بيها الا ربنا و بيجبروا الشعب على شراها بسعر عالمى عشان مافيش بديل .و رجال الاعمال الحراميه فى الاول لخلق منظومه صناعيه محليه جديده تستطيع المنافسه بعد كده و عادله بالنسبه للعمال غير طبعا اكتساب الخبرات فى الصناعات المختلفه لان بصراحه احنا بنضحك على نفسنا لما بنقول صناعه مصريه فهى رديئه و تعبر عن مص دم العامل المصرى

و بعدين لازم تعيش يا شعب شويه ناس بره بتركب عربيات عمرك ماشوفتها لانها لو جات مصر حتباع بتمنتاشر ضعف انا عايز اركبكوا عربيا عشرتلاف سى سى و ابسطكوا و لو ان الموضوع ده مربوط بالطرق و المواصلات اللى حتكلم فيها بعدين

و رفع الضرائب من على المستثمرين مقابل تشغيل العماله المصريه و برده من ناحيه تانيه حشجع بشكل غير مباشر على التعليم الفنى لتقليل الضغط على التعليم العالى اللى ساعتها يقدر يقدم خدمه على مستوى عالى



اما بالنسبه للموازنه مش حقدر اتكلم فيها دلوقتى لانى مش واثق فى كل الارقام المعلنه عن الموارد فلما امسك و اعرف حقولكم حعمل فيها ايه بالظبط و برده ساعتها مش هقول لانى ماليش خبره فى الموازنه و مش عيب يعنى مش علشان انا الريس يبقى عارف كل حاجه بس اوعدكم بتعيين مستشارين فى كل نقطه يساعدوا فى اخد القرار و مراقبه الوزارات و اعملكوا استفتاء فى كل قرار يلا يا عم يلا  يا شعب عيش حتتصور مع صوباعك  اكتر من اى حد تانى.... عيشوا



و اخيرا حد اقصى للاجور 30 الف جنيه اللى هيكونوا مرتبى مش بيقولوا دوله فقيره طب خلاص يبقى فقر على الكل و لا هى بس على الغلابه ماتخفش يا شعب انا معاكم مش عليكم


اتبقى الطرق و المواصلات و العمل و العمال و المشاريع القوميه لعلاج الفقر و انهاء العشوائيات اطلاق الحريات و العلاقات الخارجيه و اليات المراقبه و الترقيه و دول فى الجزء التانى من البرنامج حشرح حعمل فيهم ايه


المهم انه يكون برنامجى وضح ومش زى تانيين اللى برامجهم شبه بعض فى الخطوط العريضه و مش بيقولوا حيطبقوها ازاى و عشان كده مش لاقى منافس حقيقى غير المرشح رمز البطه

يا شعب والله حبسطكوا اوى و مافيش قرار حخدوا لوحدى انتوا معايا على الحلوه و المره و انا مؤمن انى موظف باخد مرتبى من الحكومه زى اقل موظف فى البلد و حسمع كلامكم يا شعب و لو مسمعتش ابقوا اخلعونى اوعوا تسيبونى و النبى و حبقى فرحان بيكوا اوى

الجزء التانى حتكلم فى الملفات الباقيه المهمه اوى ده...بس بعدها و النبى انتخبونى و النبى


الأحد، 12 يونيو 2011

قالولنا مسكوا الجاسوس

قالولنا مسكوا الجاسوس
ليه هو احنا كنا فى حرب البسوس
حكى ما يصدقوا فى الدنيا غير التيوس
ياخوفى عليكى يا ثوره من السوس
اللى عمال ينخر فيكى وعليكى بيدوس
يااما خايف عليكى من عسكر الهكسوس
و من ثعالب مكارين فى كل بياده بتبوس
عايزين فى كل ثانيه للثوره يدوا دبوس
 والله ماحنسيبك و حنخلى العسكردايما مكبوس
و لا حنخلى تانى صراخنا جوا صدورنا محبوس
و غير ايدك انتى والله ماحرضى ابوس

الجمعة، 10 يونيو 2011

انا المجهول..انا الوحيد

رايح لوحدى فكرنى شريد
بس انا عمرى ماحكون وحيد
عشانك ضربونى بنار و حديد
و سبتنى ولا حتى كلمه تاييد
ليه بدون شرف عنى بتحيد
و تقول عليا سجين او عربيد
مش مهم  بتقول ايه و تعيد
المهم ماتكونش تانى من العبيد
وفى حب مصر تموت اكيد
علشان اكون فى غربتى سعيد
و مازعلش انى روحت وحيد
عرفتنى!! انا المجهول.. انا الشهيد

الثلاثاء، 7 يونيو 2011

نحتاج إلى.... ثورة على انفسنا ..... شرطة قويه لها هيبتها فى وجود هيئة اشراف نزيهه... بقلم شريف شلبى

نحتاج إلى.... ثورة على انفسنا ..... شرطة قويه لها هيبتها فى وجود هيئة اشراف نزيهه
نحتاج لثورة حقيقيه ضد الجهل و مخالفة القوانين ثورة على انفسنا ليصبح كل منا مواطن صالح يعرف الخطأ قبل الصواب من نفسه ... نحتاج الى التوعية و التكاتف جميعا للوقوف فى وجه الخطا و القيم التى استبيحت وللأسف حتى من المتعلمين و المثقفين منا و الذى يظهر جليا فى الشارع حيث تمارس كل الانتهاكات بداية من الباعة الذين اقاموا معارضهم فى نهر الطريق الى السادة اصحاب و سائقى السيارات المخالفين بكل انواع المخالفات من انتظار فى الممنوع و السير عكس الاتجاه .... كل ذلك لا يعد شيئا بالمقارنة بعودة فانون الغاب و البقاء للأقوى ..... و لا يعقل ابدا ان يكون فى ثقافتنا و سلوكنا عسكرى لكل مواطن حسب ماتفرضه مجريات الامور .... و هنا ياتى الدور المكلف به الجهاز الامنى الذى بتقاضى راتبه منا كافراد دافعى ضرائب فهم يعملون لدى الشعب و يتقاضون اجورهم من اموال الشعب للقيام بالدور الموكل اليهم فى التصدى و بكل حسم لاى خلل يطرأ او مخالفة للقانون تطرأ على المجتمع بما فيها انفسهم و هنا النقطة الحرجة التى يجب ان توضع لها ضوابط واضحة المعالم كى لا يتحول رجل القانون المكلف بالحفاظ على القوانين و الحرص على تنفيذها الى اول مخالف لها مما يستوجب العقاب المشدد لأنه يخالف الدور الموكل اليه اساس وظيفته .... من المعلوم ان اعمال البلطجة خاصة فى الوقت الحالى تعد من احطر و اكبر الجرائم التى يجب مواجهتها بمنتهى الشدة و الحسم لانها تشوه صورة ثورة نظيفة قامت ضد الفساد ...ولا يعقل ان يحل فساد من نوع اخر محله و هنا يجب وضع معايير للتعامل بحسم مع البلطجيه دون سواهم اى يجب وضع هيئة رقابية لها دور فعلى فى تقييم اى تجاوز .... فالكل يعلم ان العنف لا يجابه الا بمثيله و لكن يجب وضع حد فاصل للدرجة التى يجب وقف العنف عندها و هى تمام السيطرة على البلطجى او اى مخالف للقانون بصفة عامه وعندما تتم تلك السيطرة  يجب التوقف تماما عن استخدام اى صورة للعنف .... اى اننا فى النهاية نحتاج الى اولا التوعية و الثقافه القانونيه و السلوكيه للمواطنين كما نحتاج بذات الوقت الى الشرطه فى صورتها القويه التى لها هيبتها بصورة صحيحه و سليمه بعيدة عن استغلال النفوذ او الافراط فى العنف مع احترام آدمية الانسان فقد وضع القانون عقوبات لكل جريمه وترك امر نحديد العقوبة للقضاء طبقا للقوانين المنظمة لذلك واول من يحتاج الى التوعيه قيادات الشرطه فليسوا منوطين بالحكم و لا بتحديد العقوبة حتى لو كانت الجريمة واقعة عليهم فى صورة اعتداء حدد القانون عقوباته بالتعدى على موظف عام اثناء تأديته لمهامه الوظيفيه و مقاومة السلطات و غيرها من العقوبات القانونيه بعيدا عن الثار و الانتقام الشخصى فهم المنوط بهم تنفيذ القانون و لا يعقل باى شكل ان يكونوا اول من يقوم بخرق القوانين فذلك من شأنه ان يزيد اتساع الفجوة بين المواطنين و جهاز الشرطة ليصل للدرجة التى تصبح فيها الشرطه عبأ على الشعب يتقاضون اجورا لا يعملون بيها و يترفعون على دافعى اجورهم ... و طبعا لابد من مجابهة ظواهر العنف الاجراميه بما يتناسب معها من عنف مع وضع معايير محددة وقيود على استخدام العنف المفرط كى لا يتم استخدامه ارضاءا للأهواء الشخصية ولضمان ذلك يجب وجود سلطة رقابيه لها الخبرة فى اجراء التحقيقات لتحديد اى تجاوز من عدمه ثم يكون لها سلطة المحاسبة او التقديم للمحاكمة لتوقيع الجزاء الادارى او الجنائى او كلاهما فى حالة وجود تجاوز.... كما يجب بذات الوقت حضور هيئات مدنية من جمعيات حقوق الانسان 
شريف شلبى

الأحد، 5 يونيو 2011

فى حب مصر

كلامى موجه لكل الناس اللى قاعده على الكنبه و مستنيه الاستكرار و عجله الانتاج
الحب كلمه ملهاش معنى غير العشق بلا منتهى و التضحيه عشانها بالحياه
الشهداء حبوا مصر...
المصابين عرفوا طريق عشقها
المعتصمين رسموا ضحكتها
و النهارده ببص حوليا مش لاقى ثوره و لاقى كلام و تخوين و قرف و تفتيت و كل ناس نسيت مصر و الحلم الجميل اللى حلمناه فى التحرير

حصل ايه من يوم الثوره؟ غيرنا اشكال..
 فين النظام اللى وقع...حرام عليكم قلبى اتوجع
حكومه رئيس وزرائها من الميدان..ووزرائها من التعابين
تعذيب و موت فى السجون...و ابن بلدى بقى مجنون
اقتصاد بيدبحوه...و موازنه دعاره بيقولوه
شباب ثاير خدوه العسكر...و حراميه محميين فى المعسكر
خالد سعيد مات...بس الثوره لسه بتموت
لتلحقوها ...لتخرسوا و تسيبونا
احنا بنحبها و بنموت فى ترابها...عارفين مين ...طبعا عارفين ... و لا حتعملوا هبل زى ما قولنا واد مات فى القسم و قولتوا يستاهل..حته سواق ميكروباص
و هلا هالله على الجد دلوقتى...بصوا بقى اللى راضى بالموازنه و اللى راضى ابن بلده يموتوه وزاره ملابس الداخليه هما نفس الناس اللى شتمت اهل دوله الميدان...فخلاص صوتكوا مش مسموع لانكم عبيد و زى ما كنتوا عبيد لمبارك حتكونوا عبيد لينا..و ايه المشكله؟؟!!
و مش حقبل حته عيل لبسلى بدله عليها دبورتين يضرب بالقلم شحات فى الشارع و لا حتى بلطجى
و لا ريس للبلد تعملوه اله زى الهبل اللى عملوا مظاهره للعسكر
و اللى يحكمك يا مصر ...خدامك و خدام اهلك
و لو مش عجبنا نديله بالجزمه
و نعيد تانى يمكن اللى مفهمش يفهم
كل اللى جرى بعد الثوره مش مقبول زى قرارات المجلس العسكرى المنفرده و زى فزاعه الاقتصاد اللى طلعها الاهبل رضوان و زى الموازنه الداعره اللى برده موقفتش جنب الفقير المفروم
و زى ما الشرطه رجعت عشان تقولنا لبلطجتى و وساختى لا نعد فى البيت و نلبس قمصان نوم...احب اقلوهم انتوا لبسينه من  يوم 28 يناير بس مش واخدين بالكوا
و يالى بتقول اصل كل المشاكل مع بتوع الميكروباص اقولك يالى مابتفهمش الثوره ده نجحت بوقوف السواقين و الطبقه الفقيره جنب الثوره فى الميادين و اللى انتوا دلوقتى بتقولوا سيبوهم يدبحوا عشان الاستكرار...يا ولاد و لا اسكت يا لسانى

و يا مجلسنا يالى مابتسمعش خد بالك من مطالبنا يوم 27 مايو اللى فات لحسن انت طنشت خالص..هو صحيح حكم مصر مغرى كده؟
و يا مجلس وزارئنا انت مش من حقك تاخد سلفه  من بره لانك مؤقت و كفايه بقى توقعنا فى متاهات
الخلاصه مش حسيبك و اسكت تانى يا اجمل بلد و لا حبطل اتكلم لحد ماتنضفى من سوسك اللى ماليكى
و لغايه ماكل واحد اتبهدل فى ترابك يرجعله حقه و كرامته سواء مات او عايش
كلمه اخيره لبتوع الاستكرار : بحق دم الشهداء مش حنبطل مظاهرات روحوا اتنيلوا قعدوا فى بيوتكم او حبوها بقى زينا شويه انتوا ايه ماعندكمش دم!!!

بكره كلنا لازم نقف لخالد سعيد و ميعادنا يوم الجمعه الجايه زى ما قولنا و اعتصام مفتوح مادام ماتحققتش المطالب لحد الجمعه


لا حيرجعنا خوف و لا حيشقوا الصفوف